പ്രകൃതി വാതക പൈപ്പ് ലൈനിനെതിരെ പ്രക്ഷോഭം സംഘടിപ്പിക്കും: എസ്.ഡി.പി.ഐ

തണ്ണീര്‍ക്കോട്:  കേന്ദ്ര പെട്രോളിയം പ്രകൃതി വാതക മന്ത്രാലയത്തിന്റെ കീഴിലുള്ള ഗെയില്‍ എന്ന സ്ഥാപനം നടപ്പാക്കുന്ന പ്രകൃതിവാതക പൈപ്പ് ലൈനിനെതിരെ പ്രക്ഷോഭം സംഘടിപ്പിക്കുമെന്ന് എസ്.ഡി.പി.ഐ തൃത്താല മണ്ഡലം കമ്മിറ്റിയോഗം വ്യക്തമാക്കി. ജനങ്ങളുടെ ജീവന് മുകളിലൂടെ നടപ്പാക്കുന്ന വികസനപദ്ധതികള്‍ അനുവദിക്കില്ല. കൊച്ചി-കൂറ്റനാട്-മംഗലാപുരം-ബാംഗ്ലൂര്‍ പ്രകൃതിവാതക പൈപ്പ് ലൈന്‍ ജനങ്ങള്‍ തിങ്ങിതാമസിക്കുന്ന സ്ഥലത്തുകൂടിയാണ് കടന്നുപോകുന്നത്. തൃത്താല മണ്ഡലത്തിലെ ചാലിശേരി, പെരുമണ്ണൂര്‍, കൂറ്റനാട് തുടങ്ങിയ പ്രദേശത്തുകൂടി പോകുന്ന പൈപ്പ് ലൈന്‍ കൂറ്റനാട് മേഖലയിലെ ജനവാസകേന്ദ്രത്തില്‍ നിന്ന് തിരിഞ്ഞാണ് ബാംഗ്ലൂര്‍ ഭാഗത്തേക്ക് പോകുന്നത്. ഇതുകാരണം ഈ പ്രദേശങ്ങളില്‍ നിന്നു നിരവധി കുടുംബങ്ങള്‍ കുടിയൊഴിഞ്ഞുപോകേണ്ട അവസ്ഥയിലാണ്.
തീരദേശമേഖലയില്‍കൂടി നടപ്പാക്കാന്‍ കഴിയുന്ന പദ്ധതി അശാസ്ത്രീയമായി ജനവാസകേന്ദ്രത്തിലൂടെ നടപ്പാക്കുന്നത് ജനങ്ങളോടുള്ള വെല്ലുവിളിയാണെന്നും ഭാരവാഹികള്‍ പറഞ്ഞു. എസ്.ഡി.പി.ഐ ജില്ലാ സമ്മേളനം വിജയിപ്പിക്കാനും മണ്ഡലത്തിലെ എല്ലാ പഞ്ചായത്തുകളിലും സമ്മേളന പ്രചാരണപരിപാടികള്‍ സംഘടിപ്പിക്കാനും കമ്മിറ്റി തീരുമാനിച്ചു.
ഭാരവാഹികള്‍: റാഫി മതുപ്പുള്ളി (പ്രസിഡന്റ്), എം എ ഉമ്മര്‍ തണ്ണീര്‍ക്കോട്(ജനറല്‍ സെക്രട്ടറി), എ പി വേലായുധന്‍ (വൈസ് പ്രസിഡന്റ്), ഫൈസല്‍ കുമ്പിടി(സെക്രട്ടറി), ബക്കര്‍ ആലൂര്‍ (ഖജാഞ്ചി).